Brynjar Níelsson er einn snjallasti lagaspekingur þjóðarinnar. Hann er svo snjall að ég skil hann ekki. En ég treysti dómgreind hans og veit að vegir Brynjars, eins og guðs, eru órannsakanlegir.
Auðvitað eigum við ekki að hjálpa hérna einhverju erlendu barni. Guð hjálpi okkur ef við færum að taka upp á því. Ef það vildi okkar hjálp þá hefði það bara átt að fæðast hérna. Það gerðum við Brynjar báðir og höfum ekki séð eftir því.
Um leið og við hjálpum einu veiku barni í lífshættu þá gæti það spurst út! Allir gætu haldið að við Íslendingar séum góðhjartað og kristið fólk sem hjálpi bara börnum og björgum lífi þeirra eins og ekkert sé sjálfsagðara. Eins og Brynjar bendir réttilega á þá færi allt kerfið í rúst.
Okkar æðislega kerfi, kerfið sem við treystum á að sé í lagi er afar viðkvæmt fyrir utanaðkomandi áhrifum. Það ríkir hér ákveðinn sáttmáli meðal þjóðarinnar sem má ekki raska. Við kjósum ákveðna einstaklinga á þing fyrir okkur og í staðinn fá þeir og vinir þeirra að lifa eins og kóngar á kostnað okkar hinna. Þetta er gott kerfi, sanngjarnt eins langt og það nær en kerfið springur í loft upp um leið og við förum að sýna einhvern kærleika eða óþarfa góðmennsku.
Jesús sagði: „Leyfið börnunum að koma til mín.“ Hann var auðvitað ekki að meina albönsk börn. Jesús var ekki eins pottþéttur á orðalaginu og hvernig orða skal lög til að koma í veg fyrir misskilning eins og Brynjar.
Nú eins og Brynjar bendir réttilega á þá „er fullt af veikum börnum“. Svo mörg að vissir Sjálfstæðismenn eru farnir að sjá mikil viðskiptatækfæri þar. En við þurfum að horfa á hlutina í stærra samhengi.
Þetta er kannski Sjálfstæðisstefnan í hnotskurn því á sama tíma er Bjarni Benediktsson að benda á að það er fullt af veiku fólki. Ef við veitum einum öryrkja mannsæmandi lífsskilyrði þá koma allir og vilja brjóta á sér bakið, örkumla sig varanlega eða þróa með sér geðsjúkdóm til að þurfa aldrei að vinna en hafa samt peninga milli handana sem duga til að lifa.
Eins er þetta með börnin. Ef það fréttist að við höfum ekki hent dauðadæmdu barni úr landi sem hægt hefði verið að bjarga þá flykkjast hingað fjölskyldur sem eru tilbúin til að gera allt og fórna öllu fyrir fársjúku börnin sín.
Jafnvel aðlagast hérna samfélaginu, vinna myrkranna á milli störf sem við Íslendingar viljum hvort er eð ekki vinna sjálf. Og fyrr en varir hefur Ísland fyllst af hörkuduglegu fólki sem á landi og þjóð allt sitt að þakka og er jafnvel tilbúið að gera meira fyrir okkur í staðinn en við sjálf myndum nokkurn tíma láta detta okkur í hug.
Hugsið ykkur skaðann ef landið fyllist af fólki sem vill vera hérna! Er ekki bara fast hérna eins og við hin að bíða eftir næstu stóru peningjöf Framsóknarflokksins.
Ég er bara alveg sammála Brynjari og þeim sem eru á hans línu. Þetta barn verður bara að deyja. Annars gætum við þurft að bjarga fleiri börnum og það er bara eitthvað sem ég gæti ekki lifað við.