Hystería á sér langa sögu. Forn-Grikkir trúðu því að móðurlífið eða „hyster“ væri lifandi dýr sem ætti sök á fjölmörgum kvillum kvenna.
Á 19. öldinni var það algeng skoðun að hysteríu mætti rekja til tilfinningalegs ójafnvægis, einkum hjá ógiftum konum og ekkjum. Hysterían gat þá tekið á sig ýmsar myndir og voru yfir 100 einkenni rakin til þessa ástands. Um og eftir miðja 20. öldina þótti það slæmt að greinast með hysteríu því hún hafði á sér stimpil ímyndunarveiki.
Orðið hystería hvarf formlega úr greiningarkóðum læknisfræðinnar um 1980 en hvað varð þá um fólkið og vandamál þess? Hvarf hysterían?
Þóra Andrésdóttir
Í heilsuspjalli í Hannesarholti þriðjudaginn 12. apríl kl 20 munu taugalæknirinn Finnbogi Jakobsson og sjúkraþjálfarinn Þóra Andrésdóttir veita okkur áhugaverða og afar myndræna innsýn í þann sjúkdómsheim sem áður var kenndur við hysteríu en er í dag flokkaður undir heitinu starfræn einkenni frá taugakerfinu.
Finnbogi Jakobsson
Það mun eflaust koma mörgum skemmtilega á óvart hvað skilningur okkar á eðli þessa algenga vanda og leiðir til úrlausnar hafa þróast á síðustu árum.
Aðgangseyrir kr. 1000
Veitingastofur opna kl. 18.30 og gestir geta gætt sér á léttum kvöldverði áður en erindið hefst. Bóka þarf borð fyrirfram í síma 511 1904 eða senda póst á netfangið hannesarholt@hannesarholt.is