Jón Kalman Stefánsson rithöfundur segir í grein í danska blaðinu Information í dag, mánudag, að Steingrímur J. Sigfússon ætti að biðjast afsökunar á að hafa boðið Piu Kjærsgaard að ávarpa hátíðarfund Alþingis, segja af sér og leyfa öðrum að taka við stöðu forseta Alþingis. Eða á dönsku:
„Det var klodset og udtryk for svigtende dømmekraft, da Altingets formand inviterede hende til Island – vedkommende burde undskylde, rejse sig fra sin plads og lade en anden overtage den.“
Áður hafa greinar eftir Guðmund Andra Thorsson og Piu Kjærsgaard um málið birst á síðum Information. Átökin um hátíðarfund sem ætlað var að fagna 100 ára fullveldi Íslands fara nú þannig einkum fram á dönsku.
Galin veröld á vegferð til fasisma
Í greininni jafnar Jón aðkomu Kjærsgaard að stjórnmálum við aðkomu Marine Le Pen í Frakklandi og Donalds Trump í Bandaríkjunum. Hann segir Kjærsgaard ekki eina á ferð heldur einkenni á „galinni veröld“, þar sem Ítalía, Bandaríkin, Pólland, Austurríki og Ungverjaland sigli hraðbyri í átt frá lýðræðinu til „myrkurs fasismans“.
Jón segir Kjærsgaard vera stjórnmálamann sem álíti eigin menningu öðrum „betri og æðri“ og vilji halda henni „hreinni“. Hann segir Íslendingum hætta til að telja sig geta ferðast frítt í heiminum, í krafti fólksfæðar og krúttleika, og ekki þurfa að taka afstöðu til stærri mála, Íslendinga sé ekki hægt að draga til ábyrgðar fyrir þau. Hin sterku viðbrögð almennings við boði Kjærsgaard til þingvalla veki von um að það sé að verða Íslendingum ljóst að það sem sagt er og gert á landinu er hluti af stærra samtali.